23. Dezember: hessisch part 4

Uffgebassd, jetzt kimmt ebbes fer Weihnachte...

Es iss gottwaaswielang her, da hat de römische Kaiser Augustus wisse wolle, wieviel Unnertane er hat, aach weche de Steuern unn so. Dass es kaan Dorchenanner gewwe sollt, musst jeder dahie wo er geborn worn iss - unn sollt dort datemäßisch erfasst wern...!

De Zimmermann Joseph musst mit seiner Fraa, de Maria, nach Bethlehem. Dess war dumm, denn die Maria war im neunte Monat unn konnt alle Aacheblick ihr Kind kriehe.

Wie se dort aakomme sin, iss nadierlich kaa Zimmer frei, unn sie erwische grad noch e Privatquardier innere Scheuer.

Unn es musst ja so komme: Schon krieht die Maria ihr Wehe unn dess Bobbelsche kimmt in em Kuhstall uff die Welt.

Na, de Joseph, praktisch wie er iss, hats gleich in Winnele gepackt, Stroh ins Eselskrippche gedaa unn die Klaane druffgeleecht. - Unn dess alles mitte in de Nacht! 

Drauße, uffm Feld warn die Herte bei ihrer Herde unn hawwe uffgebassd, dass kaa Schäfcher geklaut wern. Bei dene viele Fremde kann mer ja nie wisse...!

Morsche gehts weider...

¹Quelle: Offebacher Wörter- unn Sprüchebuch, gesammelt von Tom Kratz im Verlag Waldemar Klein 1997 erschienen

basimue